في فترة ما كان كل الناس على فيسبوك بيكتبوا جنب أساميهم CEO أو Founder؟
كانت موضة وقتها. كل اللي كان عايز يعمل مشروع، كان يعمل لوجو وصفحة على فيسبوك، وخلاص.. مبروك بقى عندك بيزنس!
الموضوع ده لسه بيحصل لحد النهاردة بس في شكل مختلف.
نفس القصة بتتكرر مع المنصات والمشاريع الإعلامية.
- عايز تعمل منصة أخبار؟ اعمل هوية بصرية، وصفحة على إنستجرام.
- عندك فكرة لبودكاست؟ طب بسرعة نعمل لوجو، ونشتري مايك!
- عايز تعمل مشروع دعوي، تعليمي، أو حتى ترفيهي؟ خلاص، اعمل براندينج، وابدأ تنزل بوستات.
لكن بعد شوية، الصدمة بتحصل:
- طيب.. هنقول إيه؟
- هننشر لمين؟
- نعين فريق إزاي؟
- أصلاً الناس محتاجة المشروع ده ولا إحنا اللي شايفين إنهم محتاجينه؟
القاعدة بتقول: الحاجة أم الاختراع!
ليه كل يومين تلاتة بيطلع لنا مشروع إعلامي جديد؟ كل شهر تقريبًا بنلاقي بودكاست جديد، منصة جديدة، قناة يوتيوب جديدة، موقع أخباري جديد..
هل السوق/ الجمهور فعلًا محتاجين لكل ده؟
الإجابة: نعم ولا!
نعم، لأن العالم بيتغير، والمستهلك الرقمي بقى عنده توقعات مختلفة، والمجالات دي فيها فرص ضخمة.
ولا، لأن أغلب المشاريع دي بتبدأ من المكان الغلط.
ليه مشاريع بتنجح وأخرى بتفشل؟
في أسباب كتير، ممكن تكون في التمويل، أو في الإدارة، أو في الكفاءات اللي بتشغل المشاريع، وكل ده حقيقي.
لكن السبب الأهم؟ الخلل في ترتيب الأولويات.
أغلب المشاريع بتبدأ من السؤال الغلط: "إزاي نعمل منصة؟"، بدل ما يكون السؤال:
"إزاي نلاقي فجوة حقيقية، نقدم قيمة وشيء الجمهور محتاجه"
اللي بينجح هو اللي بيبدأ من الجمهور مش من تصميم هوية بصرية!
مشروعك الإعلامي مش هو اللوجو، ولا حتى الهوية البصرية، مش المنصة اللي هتنشر عليها ولا الفريق اللي هتشغله.
مشروعك هو: فكرة قوية + فهم عميق للجمهور + استراتيجية ذكية.
كل حاجة تانية أدوات.. واللي بيركز على الأدوات قبل المحتوى، غالبًا بينتهي بيه الحال وسط المشاريع اللي "لا ناجحة ولا فاشلة".. اللي هي موجودة وخلاص.
كيف تبدأ منصة إعلامية؟
- ابدأ من الجمهور، مش من التصميم. اسأل نفسك: مين محتاج يسمعك؟ وإزاي هتضيف قيمة حقيقية لحياته؟
- حدد الهدف من المحتوى، مش المنصة. مش مهم تنزل على إنستجرام أو تيك توك أو يوتيوب.. المهم المحتوى نفسه يخدم الغرض الصح.
- متتسرعش في اللوجستيات. ركز على الفكرة، على التخطيط، على الرؤية. التصميم، التوظيف، واللوجستيات هتيجي في وقتها.
السؤال الحقيقي اللي لو قدرت تجاوبه صح هتنجح هو: ليه الناس هتهتم من الأساس؟
التعليقات
لا يوجد أي تعليقات لعرضها.
تسجيل الدخولمقالات أخرى
إنتاج المحتوى كطريقة لزيادة الخبرة
هل سألت نفسك: لماذا أصنع محتوى باستمرار؟ممكن تفكر إن إنتاجك للمحتوى سببه إن عندك خبرة جاهزة للمشاركةوهذا صحيح… لكنه نصف الحقيقةالحقيقة الأعمق هي إن إنتاج المحتوى هو السبب اللي بيخليك تنمو كخبير في مجا
26/01/2026
عن أبنائي القرود الذين أراهم غزلانا
جربت في يوم تتعلم شيء جديد، لكن أول ما لقيته صعب قررت توقف؟بعدين جه يوم كسرت فيه القرار ده، وقلت لنفسك: خليني أستمر وأشوف النتيجة؟بشكل شخصي أنا لا أعرف شيء عن المونتاج -ولازلت- هههولما قررت أعمل محتوى
19/01/2026
لهذا السبب يجب أن تكرر محتواك
هل حدث أن خطرت لك فكرة لمحتوى جديد، ثم قلت لنفسكأنا اتكلمت عن الموضوع ده قبل كده.. مش منطقي أرجع أتكلم فيه تانيولغيت الفكرة بسبب الخوف إن الجمهور يشوفك شخص مكرر لا يقدم جديدأحب أقولك أنت مش لوحدكوأحب
11/01/2026