هل أنت صانع محتوى أم خبير في مجالك؟

في 3 أشخاص بيتكرروا عليا دايما في النقاشات والاستشارات

الشخص الأول: عنده أفكار لصناعة محتوى معرفي أو تعليمي، .. إلخ، وبيسأل نفسه: ازاي أبدأ وأحقق نتائج جيدة من صناعة المحتوى؟

الشخص الثاني: عنده خبرة واضحة في مجال معين
وعاوز يبدأ يشارك خبرته للناس، لكنه مش عارف الشكل الأنسب

الشخص الثالث: صاحب شركة أو مشروع، وعايز يعمل محتوى علشان يروج لخدماته أو منتجاته ويجذب جمهور

ورغم إنهم مختلفين… لكن دايما بيشتغلوا بنفس الطريقة
افتح حساب.. جدول محتوى.. قلد النماذج اللي انت شايفها ناجحة

لكن مع أول سؤال لهم بتظهر أصل المشكلة

"هل صناعة المحتوى هي هدفك؟… ولا وسيلة لتحقيق هدفك؟"

ببساطة.. أنت مش مضطر تكون "صانع محتوى" علشان تستخدم المحتوى لتحقيق أهدافك الرقمية. أو العكس

لازم تفرّق بين
إنك تستخدم المحتوى كوسيلة تخدم بها هدف أنت عاوز تحققه
وإنك تختار "صناعة المحتوى" نفسها كهدف ومجال ومصدر دخل

خليني أوضح لك النموذجين الأشهر اللي كل الناس تقريبا بتخلط بينهم

الأول: صانع محتوى

هدفه الأساسي هو الوصول والتفاعل
بيشتغل على جذب الانتباه
بيقدم محتوى جماهيري جذاب
بيقيس النجاح بعدد المشاهدات، الشراكات، والدخل من الإعلانات
ميزته: بيعرف يلعب مع الخوارزميات
تحديه: الاستدامة، والهوية

الثاني: الخبير المختص

بيبدأ من مشكلة حقيقية
هدفه هو حل أزمة فعلية عند جمهور محدد
بيقيس النجاح بالتأثير الحقيقي، وعدد العملاء، وعمق النتائج اللي بيحققها
بيبيع خبرته في شكل خدمات، دورات، أو استشارات
ميزته: عمق، ثقة، تحويلات
تحديه: بناء جمهور مستهدف بدون السعي وراء اللايكات

طيب، هل في مسار أحسن من التاني؟

إطلاقا.. كل مسار ليه منطقه، أدواته، ومقياس نجاحه
لكن هتكون مشكلتك كبيرة إذا كانت خطتك هي التقليد بلا وعي

والحل علشان تتجاوز هذه المشكلة إنك تعدّل السؤال

بدل ما تسأل: أنشر إيه؟
ابدأ بالسؤال الحقيقي: أنا مين؟ وبعمل ده ليه؟

وده هو بالضبط المحور الأول في منهجيتي لبناء الاستراتيجية الرقمية
تحديد الرؤية، الغاية، الرسالة، والأهداف التأسيسية

لما تعرف غايتك الحقيقية من الوجود الرقمي
تقدر ترسم المسار، وتختار الشكل، وتبني خطة المحتوى اللي تخدمك بمنتهى السهولة

هل أنت أقرب إلى صانع محتوى أم خبير مختص؟
اختبار سريع يساعدك في تحديد المسار

هل تهتم بالوصول لأكبر عدد من الناس؟ أنت أقرب لصانع محتوى
هل عندك خبرة في مجال وتحاول تبيعها؟ أنت أقرب لخبير مختص
هل تفكر في إنتاج محتوى سريع الانتشار؟ أنت أقرب لصانع محتوى
هل الأهم عندك هو بناء الثقة مع جمهور محدد؟ أنت أقرب لخبير مختص
هل تعتمد على التفاعل لتحقيق الدخل؟ أنت أقرب لصانع محتوى
هل تعتمد على التحويل لخدمة أو منتج متخصص؟ أنت أقرب لخبير مختص

هذا المقال هدفه أن تكون واعي بنفسك وما تقدمه
وأن تمارس شغفك ورحلتك بناء على فهم ووعي وبصيرة