ممكن تلعب في الحافز؟

لما بتفشل في تحقيق هدف مهم… إيه أول فكرة بتخطر في بالك؟

هل بتلوم الظروف والواقع اللي حواليك وتقول: "الدنيا مش ماشية معايا"؟

ولا بتلوم نفسك وتشعر إنك فعلاً قصّرت وكان ممكن تحقق نتائج أفضل لو اجتهدت أكتر؟

السبب اللي خلاني أكتب المقال ده هو فيديو شفته لدكتورة تغذية، بتحكي عن تجربة مع مرضاها

كانت بتطلب منهم يمشوا 5000 خطوة يوميًا علشان يخسّوا. الهدف منطقي وبسيط… لكن تنفيذه كان صعب جدًا على نفسيتهم

فجربت تغيّر الحافز: بدل ما تقول لهم "امشوا علشان تنزلوا وزن"، طلبت منهم يمشوا علشان دي سنة نبوية وقالت لهم حديث: عليكم بالنَّسَلانِ
النتيجة؟ نسبة الالتزام ارتفعت لخمس أضعاف

الخطة هي هي. عدد الخطوات هو هو. لكن الفرق كان في المعنى المرتبط بالفعل

وأنا بشتغل مؤخرًا على مشروع جديد، كان لازم ألتزم بجدول صارم يتضمن جلسة شهرية أشرح فيها أجزاء من منهجية بناء الجمهور
بصراحة حسّيت إن الجلسة دي مجرد "تاسك تقيل" وصعب أستمر عليه

لكن جربت ألعب في الحافز، وبدل ما أشوفها مهمة روتينية، اعتبرتها فرصة لإنتاج مقاطع قصيرة أقدر أنشرها على المنصات

ما غيرتش الجدول. اللي اتغيّر هو الزاوية اللي شفت منها المهمة

المرة الجاية اللي تلاقي نفسك بتقاوم مهمة معينة، اسأل نفسك

هل فعلاً المهمة صعبة؟
ولا أنا اخترت الحافز الغلط اللي بيربطني بيها؟

يمكن مش محتاج تغيّر خطتك
يمكن كل اللي محتاجه هو إنك تلعب شوية في الحافز