من يومين، كلمني صديق وقال لي
عندي أداة بتكشف هل المقال مكتوب بالذكاء الاصطناعي ولا لا، وجربت أختبر واحدة من مقالاتك، والنتيجة طلعت 100٪ كتابة بشرية
هل أنت بتستخدم الذكاء الاصطناعي في الكتابة؟ =
قلت له بستخدمه طبعا بس بطريقتي
في المقال ده هقولك على الـ 3 خطوات اللي بعملهم قبل نشر أي محتوى
الخطوة الأولى: درّب الأداة على أسلوبك
أول حاجة عملتها، إني جمعت حوالي 30 مقال أنا كتبهم بإيدي
وديتهم لـ شات جي بي تي، وقلت له
ده أسلوبي في الكتابة، احفظه ودرب نفسك عليه
طلبت منه يحلل الجُمل، الإيقاع، نوع العناوين، استخدام القصص، وحتى اختيارات الكلمات
ببساطة، خَليت الأداة تحفظني… قبل ما أطلب منها تكتب لي
الخطوة التانية: الأفكار لازم تكون منك، مش منه
أكبر غلطة ممكن تعملها إنك تطلب من الذكاء الاصطناعي يكتب لك أفكار لمحتوى، لأنك مش هتلاقي فيها أي شيء مميز يعبر عنك أو عن تجربتك
الصح
إنك تبدأ أفكارك وتجربتك. سواء كانت ملاحظة عابرة، دونها بسرعة، أو حوار، أو موقف، أو مشكلة، أو حتى سؤال من صديق
دي أهم نقطة في الموضوع إن الأفكار لازم تكون أصلية خاص بيك وبتجربتك
الخطوة التالتة: اشْرَح فكرتك بكل تفاصيلها
لما تكون الفكرة جاهزة، ببدأ أشرحها بأكبر قدر من التفاصيل والأمثلة والمضمون اللي أنا عاوز أوصله منها، كأني بشرحها في مكالمة أو بقولها لصديق
بكتب للأداة كل التفاصيل اللي عاوز أعبر عنها في الفكرة دي ولو في جمل معينه أو عبارات عاوز أركز عليها بكتبها بالتفصيل
والنتيجة بتكون مقال من فكرتي، بأسلوبي ومصطلحاتي وأمثلتي، وقدرت في النهاية إن أوظف الذكاء الاصطناعي في تطويره بدل كتابته من الصفر
بيكون دوري في المرحلة دي هي إعادة ضبط الكلمات والمصطلحات للنسخة النهائية، علشان أتأكد إنها فعلا مناسبة لأسلوبي
التعليقات
لا يوجد أي تعليقات لعرضها.
تسجيل الدخول
